گرتوخانه‌ی چاكسازی به‌غدا چۆڵكرا

ژماره‌یه‌كی زۆر له‌و زیندانیانه‌ ره‌وانه‌ی به‌ندیخانه‌ی فیدراڵی چه‌مچه‌ماڵ و سوسێ كراون

به‌هۆی بونی هه‌ڕه‌شه‌ی تیرۆرستان له‌سه‌ر به‌ندیخانه‌ی چاكسازی ناوه‌ندی به‌غدا كه‌ به‌ به‌ندیخانه‌ی (ئه‌بو غرێب) ناسراوه‌ چۆڵكراو زیندانیه‌كانی گواسترانه‌وه‌، به‌پێی زانیاریه‌كانی PUKmedia ژماره‌یه‌كی زۆر له‌و زیندانیانه‌ ره‌وانه‌ی به‌ندیخانه‌ی فیدراڵی چه‌مچه‌ماڵ و سوسێ كراون.

حه‌سه‌ن شه‌ممه‌ری وه‌زیری دادی عیراق له‌ماڵپه‌ڕی ره‌سمی وه‌زاره‌تی داد ئه‌وه‌ی ئاشكراكردوه‌ كه‌ ماوه‌یه‌كی زۆره‌ هه‌ڕه‌شه‌ی تیرۆرستان له‌سه‌ر به‌ندیخانه‌ی چاكسازی گه‌ورانی ناوه‌ندی به‌غداده‌ كه‌ زیاتر له‌ 2 هه‌زارو 400 زیندانی تێدایه‌و به‌مادده‌كانی 4ی تیرۆرو 406 سزادراون، بۆیه‌ بڕیار له‌سه‌ر گواستنه‌وه‌ی ئه‌و زیندانیانه‌ درا بۆ به‌ندیخانه‌كانی تری عیراق.

شه‌ممه‌ری ئه‌وه‌یشی نه‌شاردۆته‌وه‌ كه‌به‌ندیخانه‌ی ناوه‌ندی به‌غدا به‌به‌رده‌وامی هه‌ڕه‌شه‌ی گروپه‌ تیرۆرستییه‌كانی له‌سه‌ر بوه‌ بۆیه‌ ئه‌و بڕیاره‌یان ده‌كردوه‌.
سه‌رچاوه‌یه‌كیش له‌به‌ندیخانه‌ی فیدراڵی چه‌مچه‌ماڵ به‌ PUKmedia راكه‌یاند: له‌سه‌ره‌تای ئه‌م هه‌فته‌یه‌وه‌ 400 زیندانی له‌ به‌ندیخانه‌ی ئه‌بو غرێب گواستراونه‌ته‌وه‌ بۆ به‌ندیخانه‌ی فیدراڵی چه‌مچه‌ماڵ.

ئه‌و سه‌رچاوه‌یه‌ باسی له‌وه‌شكرد كه‌ ژماره‌ی زیندانیانی به‌ندیخانه‌كه‌یان به‌هۆی هێنانی ئه‌و ژماره‌ زۆره‌ زیندانیه‌وه‌ له‌ئێستا 3 هه‌زار و 300 زیندانیه‌ ئه‌م رێژه‌یه‌ش بۆ به‌ندیخانه‌ی فیدراڵی چه‌مچه‌ماڵ زۆره‌، هه‌روه‌ها به‌وته‌ی سه‌رچاوه‌كه‌ ژماره‌یه‌ك زیندانی تریش ره‌وانه‌ به‌ندخانه‌ی سوسێ كراوه‌.

PUKmedia   هه‌ردی ئه‌بو به‌كر