میسر.. شه‌مه‌نده‌فه‌رێك له‌هێڵی خۆی ده‌رده‌چێت و ده‌یان كه‌س ده‌بنه‌ قوربانی

.

له‌وێستگه‌ی هێڵی شه‌مه‌نده‌فه‌ری ته‌وخ له‌ پارێزگای قلیوبیه‌، شه‌مه‌نده‌فه‌رێكی هێڵی قاهیره‌ - مه‌نسوڕه‌ له‌نزیك وێستگه‌كه‌، له‌هێڵه‌كه‌ی خۆی ده‌رده‌چێت و ده‌یان قوربانی لێده‌كه‌وێته‌وه‌.

دوابه‌دوای رووداوه‌كه‌، مسته‌فا مه‌دبولی، سه‌رۆكی وه‌زیرانی میسڕ، په‌یوه‌ندییه‌كی ته‌له‌فۆنی له‌گه‌ڵ وه‌زیری گواستنه‌وه‌و پارێزگاری قلیوبیه‌ ئه‌نجامدا تاوه‌كو به‌دواداچوون بۆ رووداوی له‌هێڵ ده‌رچوونی شه‌مه‌فه‌نده‌فه‌ری نێوان قاهیره‌-مه‌نسوڕه‌ بكه‌ن و وه‌زاره‌تی ته‌ندروستیشی راسپارد سه‌رجه‌م خزمه‌تگوزارییه‌ پێویسته‌كان بۆ قوربانیانی رووداوه‌كه‌ دابین بكه‌ن.

یه‌كسه‌ر له‌گه‌ڵ دروستبوونی رووداوه‌كه‌، وه‌زاره‌تی ته‌ندروستی و نیشته‌جێكردن ده‌ستبه‌جێ ژماره‌یه‌كی زۆر ئوتۆمبێلی فریاكه‌وتنی گه‌یاندۆته‌ شوێنی رووداوه‌كه‌و سه‌رجه‌م برینداره‌كانی بۆ نه‌خۆشخانه‌كانی (به‌نهای فێركاری، قلیوبی پسپۆڕی و به‌نهای زانكۆ) گواستۆته‌وه‌.

لای خۆیه‌وه‌، د.خالید  موجاهید، وته‌بێژ به‌ناوی وه‌زاره‌تی ته‌ندروستی و نیشته‌جێكردن رایگه‌یاند: سه‌رجه‌م برینداره‌كان بۆ نه‌خۆشخانه‌ گواستراونه‌ته‌وه‌و چاره‌سه‌ری پێویستیان بۆ ده‌كرێت، جه‌ختیشی كرده‌وه‌ كه‌ سه‌رجه‌م نه‌خۆشخانه‌كانی پارێزگای قلیوبییه‌ خراونه‌ته‌ ئه‌وپه‌ڕی حاڵه‌تی ئاماده‌باشییه‌وه‌.

یاریده‌ری وه‌زیری ته‌ندروستی و نیشته‌جێكردن بۆ میدیاو هۆشیاری رایگه‌یاند، د.هاله‌ زاید، وه‌زیری ته‌ندروستی و نیشته‌جێكردنی میسڕ بۆ به‌دواداچوونی دۆخی برینداره‌كان، سه‌ردانی پارێزگای قلیوبیه‌ی كردووه‌.

PUKmedia ئاژانسه‌كان