كێشه‌ی دابه‌شكردنی ئاوی سلێمانی چاره‌سه‌ركرا

.

بەهۆی تەقینی بۆری سەرەكی دابەشكردنی ئاوی سلێمانی، ماوەی چەند سەعاتێك شارەكە بێ ئاو بوو و ئەمڕۆش لەلایەن تیمەكانی بەڕێوەبەرایەتی ئاوی سلێمانییەوە كێشەكە چارەسەر كرا و لە ئێستادا ئاوی شارەكە دابینكراوە.

لەو بارەیەوە رێبوار یاسین مەحمود سەرپەرشتیاری چاككردنەوەی بۆری سەرەكی دابەشكردنی ئاوی سلێمانی بە وەكالەت بە PUKmedia ی راگەیاند: دوای تەقینی بۆری سەرەكی ئاوی سلێمانی لە ناو پڕۆژەی ئاوی سەرچنار، بۆ ماوەی چەند سەعاتێك بەشێكی زۆر لە گەڕەكەكانی شاری سلێمانی بێ ئاو بوون، بە هەوڵی ئەندازیار و كارمەندانی پڕۆژەكە ئەمڕۆ توانرا بۆرییەكە چاكبكرێتەوە و ئاوی پێویست بۆ گەڕەكەكانی سلێمانی دابینبكرێت.

هاوكات هەر لەو بارەیەوە ئەندازیار عەبدوڵڵا عەلی بە PUKmediaی راگەیاند: بە كاركردنی بەردەوامی تیمەكانی بەڕێوەبەرایەتی ئاوی سلێمانی توانرا ئاو بگەڕێنرێتەوە بۆ شارەكە و لە ئێستاشدا هەندێك كاری دیكە ماوە كە لە چەند سەعاتی داهاتوودا تەواو دەكرێن.

دوێنێ یەك شەممە 5-7-2020 بۆرییەكی سەرەكی دابەشكردنی ئاوی سلێمانی لە ناو پڕۆژەی ئاوی سەرچنار تەقی و پارێزگاری سلێمانی و وتەبێژی بەڕێوەبەرایەتی ئاوی سلێمانی-یش رایانگەیاند: چاككردنەوەی بۆرییەكە 7 بۆ 10 رۆژ دەخایەنێت و لەو ماوەیەشدا بەشێكی زۆری گەڕەكەكانی سلێمانی بێ ئاو دەبن.

بەڵام بە پێچەوانەی پێشبینییەكان و بە هەوڵی بەردەوامی تیمەكانی بەڕێوەبەرایەتی ئاوی سلێمانی توانرا لە ماوەی كەمتر لە 24 سەعاتدا بۆرییەكە چاكبكرێتەوە و ئاوی پێویستیش بۆ هاووڵاتیان دابین بكەن.

زانیاری زیاتر لەم لینكەدایە...

PUKmedia جەعفەر جەلالی