خزمه‌تگوزاری ده‌گه‌یه‌نرێته‌ پرۆژه‌ی هه‌واری زانكۆی سلێمانی

.

كێشه‌ی نه‌بوونی خزمه‌تگوزاری پرۆژه‌ی نیشته‌جێبوونی " هه‌واری زانكۆ" چاره‌سه‌ر ده‌كرێت و دوای ته‌واوكردنی له‌ ماوه‌ی چه‌ند مانگی داهاتوودا به‌شداربوو پرۆژه‌كه‌ تێیدا نیشته‌جێ‌ ده‌بن.

ئه‌مڕۆ 27-2-2020 به‌ سه‌رپه‌رشتی قائیمقامی سلێمانی و ئاماده‌بونی سه‌رۆكی شاره‌وانی و سه‌رۆكی زانكۆی سلێمانی و به‌رێوبه‌ری ئاو و كاره‌با و وه‌به‌رهێنان و كۆمپانیای جێبه‌جێكار و نوێنه‌ری هاووڵاتیانی به‌شداربووی پرۆژه‌كه‌ له‌ دیوانی قائیمقامیه‌تی سلێمانی كۆبونه‌وه‌یه‌ك بۆ چاره‌سه‌ری كێشه‌ی نه‌بونی خزمه‌تگوزارییه‌كانی پرۆژه‌ی (هه‌واری زانكۆ) ئه‌نجامدرا كه‌ پێكهاتووه‌ له‌ (1224)یه‌كه‌ی نیشته‌جێبوون و بۆ فه‌رمانبه‌رانی زانكۆی سلێمانی له‌ ناوچه‌ی قوله‌ره‌یسی دروستكراوه‌.

ئاوات محه‌مه‌د قائیمقامی سلێمانی رایگه‌یاند: ئه‌م كۆبونه‌وه‌یه‌ له‌سه‌ر داوای به‌شداربوانی پرۆژه‌كه‌ بووه‌ و مه‌به‌ستمانه‌ كێشه‌كانیان بۆ چاره‌سه‌ر بكه‌ن بۆئه‌وه‌ی به‌ زوترین كات له‌ یه‌كه‌كانی نیشته‌جێبوون سودمه‌ند بن.

دوای گفتوگۆی زۆر و رێگه‌كانی چاره‌سه‌ركردنی كێشه‌كان له‌سه‌ر زۆربه‌ی بابه‌ته‌كان گه‌یشتنه‌ چاره‌سه‌ر و له‌ ماوه‌ی چه‌ند مانگی داهاتوودا به‌شداربوانی پرۆژه‌كه‌ ده‌توانن تێیدا نیشته‌جێ‌ بن.

له‌ كۆبونه‌وه‌كه‌دا له‌سه‌ر ئه‌م خاڵانه‌ی خواره‌وه‌ بڕیاردرا:
1- كێشه‌ی گه‌یاندنی ئاو چاره‌سه‌ر كرا، به‌جۆرێك كۆمپانیای جێبه‌جێكار عه‌مبارێكی ئاو دروستبكات و له‌رێگه‌ی ته‌نكه‌ره‌وه‌ ئاوی بۆبهێنێت و بیگه‌یه‌نێت به‌ یه‌یه‌كانی نیشته‌جێبوون، ئاویش له‌لایه‌ن به‌رێوبه‌رایه‌تی ئاوی سلێمانییه‌وه‌ دابین بكرێت.
2- كێشه‌ی كاره‌بای پرۆژه‌كه‌ به‌جۆرێك چاره‌سه‌ر كرا هه‌تا ئه‌و كاته‌ی كۆمپانیای جێبه‌جێكار ویستگه‌یه‌كی گۆرینی ڤۆڵتییه‌ی كاره‌با داده‌نێت، له‌رێگه‌ی مۆلیده‌وه‌ كاره‌با بدات به‌ دانیشتوانی پرۆژه‌كه‌.
3- ئاوه‌رۆی پرۆژه‌كه‌ش له‌ناو پرۆژه‌كه‌دا ته‌واو بووه‌ و به‌ ئاوه‌رۆی سه‌ره‌كییه‌وه‌ ده‌به‌سترێته‌وه‌.
4- رێگاوبانی پرۆژه‌كه‌یش له‌لایه‌ن شاره‌وانی سلێمانییه‌وه‌ جێبه‌جێده‌كرێت.

بۆ جێبه‌جێكردنی ئه‌و ته‌واوكارییانه‌ی پرۆژه‌كه‌ش لیژنه‌ی لایه‌نه‌ په‌یوه‌ندیداره‌كان چاودێری وردی پرۆژه‌كه‌ ده‌كات.

PUKmedia راگه‌یاندنی قائیمقامیه‌تی سلێمانی