سەرۆكی هەرێم بەرەو روسیا بەڕێكەوت

بۆ بەشداربوون لە كۆڕبەندی سانت پتروسبۆرگی ئابووریی نێودەوڵەتیی

بەیاروەریی وەفدێكی باڵا، ئەمڕۆ چوار شەممە 2013/6/19، مەسعود بارزانی سەرۆكی هەرێمی كوردستان بەمەبەستی بەشداربوون لە كۆڕبەندی سانت پتروسبۆرگی ئابووریی نێودەوڵەتی بەرەو روسیا بەڕێكەوت‌و دواتریش بەسەردانێكی رەسمی روو لە كۆماری رۆمانیا دەكەن.

ئەجێندای ئەم سەردانەی سەرۆك بارزانی لە میانی بەشدارییكردنیان لە كارەكانی حەڤدەمین كۆڕبەندی سانت پتروسبۆرگی ئابووری نێودەوڵەتیی كە دوو رۆژ دەخایەنێت‌و زیاتر لە پێنج هەزار بەشدار لە هەشتا وڵات تێیدا ئامادە دەبن، چەندین دیدارو كۆبوونەوە لەگەڵ ژمارەیەك كەسایەتی‌و لێپرسراوانی بەشداربوو لە پەراوێزی ئەو كۆڕبەندە لەخۆدەگرێت.

بانگهێشتكردنی مەسعود بارزانی سەرۆكی هەرێم بۆ بەشداربوون لەم كۆڕبەندە ئابوورییە نێودەوڵەتییەی سانت پتروسبۆرگ، نیشانەی گرنگی‌و بایەخدانی دنیای دەرەوەیە بە رۆڵی سەرۆكی هەرێمی كوردستان‌و حكومەتی هەرێم بەگشتیی لە بەرەوپێشبردنی پێگەی ئابووری كوردستان لەسەر ئاستی عیراق‌و ناوچەكەو جیهان، كەلە كانوونی دووەمی ئەم ساڵیش كەسایەتییەكی بانگهێشتكراوی كۆڕبەندی ئابووریی نێودەوڵەتیی داڤۆس بوو كەلە سویسرا بەسترا.

لەدوای بەكۆتاهاتنی كۆڕبەندەكەی سانت پتروسبۆرگ، سەرۆك مەسعود بارزانی بەسەردانێكی رەسمی بۆ كۆماری رۆمانیا بەرەو بوخارست پایتەخت بەڕێت دەكەوێت‌ بەمەبەست پتەوكردنی پەیوەندییە دوو قۆڵییەكانی نێوان كوردستان‌و وڵاتی رۆمانیاو تاوتوێكردنی چەندین پرسی پەیوەست بە بواری ئابووری‌و پەیوەندییە هەمەلایەنەكانی نێوان هەردوولا.

وەفدی یاروەری سەرۆك بارزانی، بریتین لە، مەسروور بارزانی راوێژكاری ئاژانسی پاراستنی ئاسایشی هەرێمی كوردستان‌و فوئاد حوسێن سەرۆكی دیوانی سەرۆكایەتی هەرێم‌و ئاشتی هەورامی وەزیری سامانە سرووشتییەكانی حكومەتی هەرێم‌و فەلاح مستەفا بەرپرسی فەرمانگەی پەیوەندییەكانی دەرەوەی حكومەتی هەرێم‌و هێرش موحەڕەم سەرۆكی دەستەی وەبەرهێنان، لەگەڵ چەندین راوێژكار.

PUKmedia