سلێمانی.. 700 ملیار دینار بۆ دروستكردنی تۆنێل و پرد تەرخاندەكرێت

كۆمپانیا بیانییەكان پڕۆژەكان ئەنجامدەدەن

بەمەبەستی دروستكردنی تۆنیل و پرد و رێگاوبان لەسنوری پارێزگای سلێمانی، وەزارەتی ئاوەدانكردنەوە لەسەر بودجەی وەبەرهێنان بڕی 700 ملیار دینار تەرخاندەكات.

توانا كەمال بەڕێوەبەری گشتی رێگاوبان سلێمانی لەوبارەیەوە بە PUKmedia ی راگەیاند: لەسەر بودجەی وەبەرهێنان بڕی 65 ملیار دینار تەرخانكراوە بۆ بواری رێگاوبان و 287 ملیاریش لەسەر بودجەی وەزارەت بۆ دروستكردنی تونێلی سەید سادق - پێنجوێن تەرخانكراوە، كە لە ئەمساڵدا دەچێتە قۆناغی جێبەجێكردنەوە.

ناوبراوا ئاماژەی بەوەشدا كە بڕی 70 ملیار دیناریش بۆ جێبەجێكردن و نوێكردنەوەی سایدی یەكەم و دووەمی كەلار - كفری تەرخانكراوە، بڕی 40 ملیاری دیكەش بۆ چاككردنی رێگەی دەربەندی رانیە - ژاراوە و دروستكردنی تۆنێلێكی دەستكرد تەرخانكراوە، هەروەها بڕی 12 ملیار دینار بۆ جێبەجێكردنی پردی دەربەندی رانیە و گۆڕینی پردەكە بۆ پردی كۆنكرێتی ئاسایی تەرخانكراوە.

بەڕێوەبەری گشتی رێگاوبان سلێمانی ئاشكراشیكرد هەر لە ئەمساڵدا بڕی 12 ملیار دیناری تر بۆ دووسایدكردنی رێگەی نێوان باشماخ - پێنجوین تەرخانكراوە، ئەگەری ئەوەش هەیە ئەو بودجەیە زیاتر بكرێت، هەروەها بڕی 160 ملیار دیناری دیكە بۆ تەواوكردنی قۆناغی دووەم و سێیەمی دووسایدكردنی رێگەی نێوان دەربەندیخان - كەلار تەرخانكراوە، بڕی پێنج ملیار دیناریش بۆ بواری چاكسازی رێگەكانی سنوری سلێمانی تەرخانكراوە.

سەبارەت بە گرێبەستەكانیان بۆ دیزاینكردنی تۆنێل و رێگە سەرەكییەكان، توانا كەمال وتی: بەهۆی كەمئەزموونی لەبواری دروستكردنی تۆنیل لە كوردستاندا، بەرێوەبەرایی رێگاوبان لەڕێگەی كۆمپانیای بیانییەكانەوە ئەو كارە ئەنجامدەدات.

وتیشی: لەئێستاشدا تێمیك لە ئەندازیارانی هەنگاریا كاری تۆنێلەكانیان گرتۆتەئەستۆ و لەرشووی ئەندازەو یاسایەوە، بۆ رێگە نوێیەكانیش كۆمپانیای بیانیمان هێناوە بۆئەوەی بەباشترین شێوە پڕۆژەكان جێبەجێ بكرێن.



PUKmedia هەردی ئەبوبەكر