نێچیرڤان بارزانی: ده‌بێ چاكسازی له‌كه‌رتی ته‌ندروستیدا بكرێت

بڕیاردرا ئه‌نجومه‌نێكی پزیشكی پێكبهێنرێت

پێشنیوه‌ڕۆی ئه‌مڕۆ 18-6، به‌ سه‌رۆكایه‌تیی نێچیرڤان بارزانی سه‌رۆك وه‌زیرانی هه‌رێمی كوردستان و به‌ ئاماده‌بوونی عیماد ئه‌حمه‌د جێگری سه‌رۆك وه‌زیران، یه‌كه‌مین كۆبوونه‌وه‌ی بۆردی ته‌ندروستی سازكرا.
له‌سه‌ره‌تای كۆبوونه‌وه‌كه‌دا، كه‌ نوێنه‌رانی سه‌ندیكاكانی بواری ته‌ندروستی و پزیشكیش ئاماده‌یبوون، سه‌رۆك وه‌زیران ئاماژه‌ی به‌گرنگیی هه‌بوونی بۆردێكی ته‌ندروستی كرد بۆ ئه‌وه‌ی له‌نزیكه‌وه‌ له‌بواری ته‌ندروستی له‌هه‌رێمی كوردستان و چۆنیه‌تیی چاره‌سه‌ركردنی كێشه‌و گرفته‌كانی بكۆڵێته‌وه‌و به‌دوایاندا بچێت، به‌مه‌به‌ستی گه‌یشتن به‌و ئامانجه‌ی كه‌ ئاستی خزمه‌تگوزاریی ته‌ندروستی بگاته‌ ستاندرادێكی مایه‌ی ره‌زامه‌ندیی هاووڵاتیانی كوردستان.

نێچیرڤان بارزانی هه‌روه‌ها دووپاتیكرده‌وه‌ كه‌ ده‌بێ چاكسازی له‌كه‌رتی ته‌ندروستیدا بكرێت و تیشكی خسته‌سه‌ر ئه‌وه‌ی دوو جۆر كێشه‌ له‌بواری ته‌ندروستیدا هه‌ن، جۆرێكیان هه‌نووكه‌یین و پێویستیان به‌چاره‌سه‌ری هه‌نووكه‌یی هه‌یه‌، جۆرێكی دیكه‌شیان كێشه‌ی درێژخایه‌نن و پێویستیان به‌دانانی به‌رنامه‌و پلانێكی سێ هه‌تا پێنج ساڵی هه‌یه‌ بۆ ئه‌وه‌ی هه‌نگاو به‌ هه‌نگاو چاره‌سه‌ر بكرێن، بۆ ئه‌مه‌ش حكومه‌تی هه‌رێمی كوردستان هه‌موو هه‌نگاوێكی پێویست ده‌نێت.

لای خۆیه‌وه‌، عیماد ئه‌حمه‌د جێگری سه‌رۆك وه‌زیرانیش داكۆكی له‌وه‌ كرده‌وه‌ كه‌ ده‌بێ زه‌مینه‌ بڕه‌خسێنرێت و كه‌رتی تایبه‌ت هان بدرێت و هاوكاری بكرێت، تا له‌گه‌ڵ كه‌رتی گشتی رۆڵی خۆی له‌بواری ته‌ندروستیدا بگێڕێت، بۆ ئه‌وه‌ی هه‌ردوولا له‌ پرۆسه‌ی چاككردنی سیستمی ته‌ندروستیدا هاوكار بن.

پاشان وه‌زیری ته‌ندروستی تیشكی خسته‌سه‌ر ئه‌وه‌ی كه‌ هه‌ر له‌سه‌ره‌تای ده‌ستبه‌كاربوونی كابینه‌ی حه‌وته‌می حكومه‌تی هه‌رێمی كوردستانه‌وه‌، به‌رنامه‌و ستراتیژی حكومه‌ت ئه‌وه‌ بووه‌ چاككردن و گۆڕین له‌سیستمی ته‌ندروستیدا بكات و بۆ ئه‌مه‌ش به‌رنامه‌یه‌كی درێژخایه‌نی هه‌یه‌.
هه‌ر له‌ چوارچێوه‌ی جێبه‌جێكردنی ئه‌و به‌رنامه‌یه‌شدا، له‌ بواره‌كانی كۆنترۆڵی ده‌رمان، په‌ره‌پێدانی ژێرخانی ته‌ندروستی به‌دروستكردنی چه‌ندین نه‌خۆشخانه‌و بنكه‌ی ته‌ندروستیی نوێ و پێشكه‌شكردنی خزمه‌تگوزاریی ته‌ندروستی و چاودێریی پزیشكیی باشتردا، چه‌ندین هه‌نگاوی كارای ناوه‌.

له‌كۆبوونه‌كه‌دا بڕیاردرا ئه‌نجومه‌نێكی پزیشكی پێكبهێنرێت، بۆ ئه‌م مه‌به‌سته‌ش لیژنه‌یه‌كی باڵا به‌سه‌رۆكایه‌تیی وه‌زیری ته‌ندروستی پێكهاتووه‌ بۆ كۆنترۆڵكردنی كاركردن و رێگه‌پێدان به‌ پزیشك و كارمه‌ندانی پیشه‌ ته‌ندروستییه‌كان و چاره‌سه‌ركردنی كێشه‌ی هه‌بوونی ده‌رمانخانه‌ نایاساییه‌كان و چه‌ندین كێشه‌و گرفتی دیكه‌ی بواری ته‌ندروستی له‌هه‌رێمی كوردستان.

له‌كۆتایی كۆبوونه‌وه‌كه‌دا، به‌ره‌وامیی راوێژو كۆبوونه‌وه‌و كاری هاوبه‌ش و هه‌ماهه‌نگی له‌نێوان بۆردی ته‌ندروستی و لایه‌نه‌ په‌یوه‌نداره‌كان و سه‌ندیكاو كۆمه‌ڵه‌كانی بواری ته‌ندروستی و پزیشكی، بۆ جێبه‌جێكردنی به‌رنامه‌ی چاكسازی له‌بواری ته‌ندروستیداو گه‌یشتن به‌پێشكه‌شكردنی ئاستێكی به‌رزی خزمه‌تگوزاریی ته‌ندروستی و چاودێریی پزیشكی بۆ هاووڵاتیان، جه‌ختی له‌سه‌ر كرایه‌وه‌.

PUKmedia راگه‌یاندنی ئه‌نجومه‌نی وه‌زیران