زنجیرەیەك تەقینەوە عیراق دەهەژێنن و دەیان شەهیدو برینداریان لێدەكەوێتەوە

زنجیرەیەك تەقینەوە عیراق دەهەژێنن و دەیان شەهیدو برینداریان لێدەكەوێتەوە

ئەمڕۆ 16-6 زنجیرەیەك پەلاماری تیرۆریستی بەغدای پایتەخت و چەند شارێكی دیكەی عیراقیان هەژاند و بە دەیان شەهید و برینداریان لێكەوتەوە.

سەرچاوەیەك ئەمنیی لە بەغدا رایگەیاند: بەهۆی تەقینەوەی دوو ئۆتۆمبێلی بۆمبڕێژكراو لە یەكێك لە شەقامەكانی قەزای مەحمودیە لە شاری بەغدا، دوو هاووڵاتی شەهید بوون و 6 ی تریش برینداربوون.

سەرچاوەكە وتیشی: لە شاری نەجەف- یش ئۆتۆمبێلێكی بۆمبڕێژكراو لەبەردەم دەرگای سەرەكی عەلوەی سەوزەو میوەفرۆشەكان تەقیوەتەوە، بەوهۆیەوە بە دەیان كەس شەهید و برینداربوون.

لەلایەن خۆشیەوە پۆلیسی ناسریە ئاشكرایكرد: بەهۆی تەقینەوەی دوو ئۆتۆمبێلی بۆمبڕێژكراو 14 كەس شەهید و برینداربوون.
سەرچاوەكەی پۆلیسی ناسریە ئاماژەی بەوەشدا كە تەقینەوەی لە ناوچەی ساڵحیە روویداوە و ژمارەیەك شەهید و برینداری لێكەوتۆتەوە، تەقینەوەی دووەمیش لە ناوچەی شەرقیە لە ناوەڕاستی شاری ناسریە روویداوە، بەوهۆیەشەوە 15 كەس شەهید و برینداربوون و زیانی ماددی زۆریش بەر بینا و باڵەخانەكانی ناوچەكە كەوتووە.

هەر ئەمڕۆ لە پارێزگای بەسرە، بەهۆی تەقینەوەی دوو ئۆتۆمبێلی بۆمبڕێژكراو لە ناوچەی توێسە، 5 پۆلیس شەهید بوون و 10 ی تریش برینداربوون، هاوكات لە ناوچەی پیشەسازی شاری كوت- یش، بەهۆی تەقینەوەی ئۆتۆمبێلێكی بۆمبڕێژكراوەوە هاووڵاتییەك شەهید بووە و 18 ی تریش برینداربوون.

لە پارێزگای بابل- یش، تیرۆریستێكی خۆكوژ بە ئۆتۆمبێلێكی بۆمبڕێژكراوەوە لە خاڵێكی پشكنین لە قەزای محاویل خۆی تەقاندۆتەوە، لە ئاكامدا 4 كەس برینداربوون، لەناوچەی جبلە- ش لە باكوری شاری حیلە، بەهۆی تەقینەوەی بۆمبێكی چێندراو 7 هاووڵاتی بە سەختی برینداربوون.


PUKmedia